ឯកឧត្ដមអភិសន្តិបណ្ឌិត ស សុខា ឧបកនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រៃវែង បានចាត់ទុកសិស្សប្រឡងជាប់និទ្ទេស A ចំនួន ១០នាក់ នៅស្រុកបាភ្នំ រួមទាំងកំណើនសិស្សជាប់និទ្ទេស A នៅខេត្តព្រៃវែងទាំងមូល ថាជាការឆ្លុះបញ្ចាំងឱ្យឃើញកាន់តែច្បាស់អំពីភាពរីកចម្រើននៃវិស័យអប់រំនៅកម្ពុជា ស្របតាមចក្ខុវិស័យដ៏វែងឆ្ងាយរបស់រាជរដ្ឋាភិបាល។
ថ្លែងក្នុងពិធីសម្ពោធឆ្លងក្លោងទ្វារ សួនច្បារ រូបសំណាក និងសមិទ្ធផលនានា នៅសាលាបឋមសិក្សាទ្រា ស្ថិតក្នុងភូមិទ្រា ឃុំឈើកាច់ ស្រុកបាភ្នំ ខេត្តព្រៃវែង នារសៀលថ្ងៃទី១៨ ខែតុលា ឆ្នាំ២០២៥ ឯកឧត្តមអភិសន្តិបណ្ឌិត ស សុខា បានចាត់ទុកសមិទ្ធផលនេះ ថាជាចំណែកដ៏សំខាន់មួយទៀតនៃការរីកចម្រើនវិស័យអប់រំ និងក៏ជាការបញ្ជាក់ពីសុខសន្តិភាព ដែលកម្ពុជា ទទួលបានដោយលំបាកបំផុត ក្រោយសម័យសង្គ្រាម ពោលគឺចាប់តាំងពីប្រទេសមិនមានសល់អ្វីសោះ រហូតបច្ចុប្បន្នមានការអភិវឌ្ឍ និងរីកចម្រើនស្ទើរគ្រប់វិស័យ ជាពិសេសគឺវិស័យអប់រំ ដែលទាមទារឱ្យមានការចូលរួមបន្តទៀត ខណៈការអប់រំបណ្តុះបណ្តាល គ្មានទីបញ្ចប់នោះទេ។
ក្នុងន័យនេះ ឯកឧត្តមអភិសន្តិបណ្ឌិត ស សុខា បានមានប្រសាសន៍ ឈរលើមរតកនយោបាយដឹកនាំរបស់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា មកដល់នីតិកាលទី៧ នៃរដ្ឋសភា សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបន្តពង្រឹងបន្ថែមទៀត វិស័យអប់រំ ដែលជាមុំសំខាន់មួយនៃយុទ្ធសាស្ត្របញ្ចកោណ។ ជាក់ស្តែងនៅឆ្នាំសិក្សា២០២៤-២០២៥ ខេត្តព្រៃវែងទាំងមូល ទទួលបានចំណាត់ថ្នាក់សិស្សប្រឡងជាប់និទេ្ទស A រហូតទៅដល់ ១៥៤នាក់ ដែលជាចំនួនមួយដ៏ច្រើន និងជាក្តីមោទនភាពសម្រាប់ខេត្តព្រៃវែង។
សូមបញ្ជាក់ថា សមិទ្ធផលសំខាន់ៗ ដែលត្រូវបានដាក់សម្ពោធនាឱកាសនោះ ក្រោមអធិបតីភាពឯកឧត្តមអភិសន្តិបណ្ឌិត ស សុខា រួមមាន៖ ក្លោងទ្វារថ្មី កម្ពស់ ៤,៧ម៉ែត្រ បណ្ដោយ ៥ម៉ែត្រ ទោងក្មេងលេង ចំនួន ៣កន្លែង ក្រាលឥដ្ឋការ៉ូ និងបំពាក់បរិក្ខាផ្សេងៗក្នុងទីចាត់ការសាលា ១កន្លែង សាងសង់ដងទង់ជាតិថ្មី ១កន្លែង ជួសជុលអគារចាស់ ១ខ្នង ចំនួន ៣បន្ទប់ ឡដុតសម្រាម ១កន្លែង ប្រព័ន្ធលូបង្ហូរទឹក ១ខ្សែ បណ្តោយ ១៣៤ម៉ែត្រ និងទទឹងប្រវែង ០,៣ម៉ែត្រ សាងសង់បល្ល័ង ៤ និងជាវរូបសំណាកព្រះពុទ្ធរូប សម្ដេចសង្ឃ ជួន ណាត លោកតាក្រម ង៉ុយ និងព្រះបាទជ័យវរ្ម័នទី៧ ដាក់អំពូលសូឡាក្នុងបរិវេណសាលា ៤គ្រឿង ចាក់ផ្លូវបេតុង ៤ខ្សែង សាងសង់សួនច្បារ ៤កន្លែង ក្រាលឥដ្ឋការ៉ូឡា ៥៥០ម៉ែត្រការ៉េ រូបចម្លាក់ផ្លែពុទ្រា ១កន្លែង និងរូបចម្លាក់សៀវភៅ ១កន្លែង ចំណាយថវិកាសរុប ៩១.១៤៥.២០០រៀល៕
#dolynews
